ادمان "الحوسبة"

حلوة الحوسبة دي، عشان بس الناس اللي بتقول العربي غلس ;)

المهم العبد لله عارف من زمان انه بقى مدمن “حوسبة” بس دلوقتي أنا متأكد 100%. اشمعنى ؟! هندخل قافية بقى ;)

لأ بجد طول الأسبوع ده وأنا بأعاني من ال withdrawl symptoms للتوقف عن الحوسبة ، أخويا - ربنا يخليهولي - بوّظ الهارد يوم السبت لما كنت أنا في الجامعة الألمانية بنعمل المهرجان بتاع جنو/لينكس، وعليه مفيش كمبيوتر في البيت وحتى لو جبت هارد تاني ملوش فايده من غير ملفاتي اللي على الهارد الأولاني ومن غير نت يبقى مفيش حاجة خالص.

المهم الأعراض من نوعية إني نايم طول اليوم، مشئ لاقي حاجة اعملها، وطول ماأنا صاحي منغاظ، هتجنن وشغّل الجهاز ده غير الصداع ئأغلب الوقت. والله العظيم ده اللي حصل وأنا مش بهزر، ويدوب امبارح بدأت أتزن تاني واعرف راسي من رجلي.

طول عمري فاكر ادمان “الحوسبة” ده هبل وئأي كلام وأتاريه طلع بجد يا ولاه ;)

طبعا أنا قاعد في محل برة البيت - أصل الروتر خرب هوه كمان، بالمرة من نفسه - والحالة كرب، بس ادعوا الهارد ربنا يشفيه أحسن عليه كل الشغل بتاعي وحاجات كتير مهمة بالنسبة لي.