ليلى

هذه التدوينة نوع من التفاعل مع “حملة” ليلى (أنا معرفش الحملة عن ايه بالتحديد لأني مقريتش أي تدوينة من اللي بدءوا الحملة إنما تعليقات وكلام عن الموضوع)

مش هتفرق لأن أنا لا ناوي أعارض ولا أأيد، أنا هقول اللي في نفسي وبس.

فيه معاملة وحشة للبنات في مصر؟ آه في (علي الأقل في الوجه البحري اللي أنا منه) وسببه ايه ماعرفش وميهمنيش وسيبك من الهجص بتاع الثقافة العربية البدوية والمجتمع الزراعي و الأصول المتجذرة في الفكر الإسلامي لأن كل ده هجص، أنا لا شفت بدو ولا عشت في مجتمع زراعي ولا أعرف ان وجد مجتمع اسلامي خلال القرون العشر السابقة علي الأقل وحتى لو عرفنا السبب مش هيغير حاجة.

لكن هل كل المجتمع بيظلم البنت؟ اللي يقول كده يبقى أهبل، أنا شفت ظلم للبنات وسيطرة للذكر (ابن خالي الذكر الوحيد لأبويه كان خالي عاملوه راجل البيت من وهوه عيل وكان عادي لما يضرب اخواته البنات أو يشخط فيهم وهما اكبر منه بخمس ست سنين) لكن في نفس الوقت طول عمري (ومازلت) حاسس ان أبويا بيحب اخواتي البنات اكتر مني انا واخواتي الصبيان (أصل احنا كتير متعدش) خد عندك مثلا “قوم فز روح قدم لاختك في التنسيق. وأنا مالي. يعني عايز تقعد قدام البتاع ده واختك تروح تقف في الشمس؟ قوم فز معنكش دم” وزى “اغسل الطبق اللي أكلت فيه. فلانة هتغسله. هي اختك شغالة عندك قوم اغسل الطبق ونضف المطبخ وانت واقف” أى والله أبويا بيعمل معايا كده، طبعا أنا ساعات بتغاظ وساعات لما أفكر يتضح لي ان أبويا عنده حق وأنا اللي معنديش دم. الخلاصة بلاش الكلام الماسخ بتاع المجتمع الذكوري و عبودية معرفش كام ألف سنة والهجص ده، لأن أبويا أبوه فلاح وجده فلاح واتربى في بيئة فلاحين ومدرسش في السربون ولا في هارفارد عشان ما يظلمش بناته (مديهم حقهم وزيادة)

يبقى اللي احنا عايزينه ان الناس اللي بتفكر غلط تبطل تفكر غلط، نحارب الغلط ده آه، نعمل حمله وايه لأ، نخصي الرجالة اللي بيعاكسوا البنات يا سلام أحسن حاجة (المفروض كل راجل عنده دم يشيل معاه سلاح هو كمان ولما واحد يتحرش بواحده نخصيه احنا عشان ينقرضوا والبلد تنضف)

انما متقعدش واحدة مالهاش شغلانة تقولي عبودية وذل ومجتمع ذكوري والهبل ده، مجتمع ذكوري ايه والنبي وأنا أغلب الناس اللي اعرفهم بيستشيروا مراتاتهم في الكبيرة والصغيره ومراته هي اللي بتمشي البيت وتقوله يصرف ولا نا يصرفش فبلاش عبط الله يكرمكه وركزه في الحاجات الحقيقية

و ناس تقول مساواه حلو، تدور علي المساواه دي تلاقي ناس تقول اشمعني الواد يسهر والبنت لأ نسهر اللي اتنين بره البيت وبالنرة يشربه بانجوا وبيره وتبقى تمام، بدل ما نلم العيال اللي صاعت وباظت نسيب البنات يبوظوا وبعدين نقول هما أحرار (طبعا مش كل الناس بتقول الهبل ده)

وناس تانية تقولك الست تشتغل، وماله ما نشيلها طوب وزلط مع الفواعليه بتوع الخرسانه بالمرة، ونقعد الراجل في البيت عشان الواد اللي يعيط يرميه من الشباك ولا يسيب الواد عيان ويقعد يتفرج علي المطش ويقول دا الواد بيمثل. تشتغل الست ماشي بس ده اثتثناء مش قاعده

المهم سيبك انته الساعة 4 والجر هيدن وأنا فاصل أساسا والدنيا بمبي بمبي