بعد معرفش قد إيه من التدوين - بصراحة أنا مكسل أجيب أول تدوينة وشوف تاريخها كام - حاسس أن أنا غريب و لوحدى فى عالم المدونين - إذا كان فى حاجة اسمها عالم المودنين أصلا -

يعنى أنا معرفش أى حد من المدونين معرفة قريبة - حتى الناس اللى اعرفهم أعرفهم لأسباب لا علاقة لها بالتدوين - وتقريبا ما بتابعش أى مدونة متابعة منتظمة - ولا حتى المدونات اللى أنا حاطط ليها روابط فوق - ومفيش حد معين - على حد علمى - بيتابع المدونة دى، وحتى أغلب التعليقات من أشخاص مجهولين.

يعنى من الآخر زى ما أنا شخص منعزل ومليش علاقات حميمة بأى حد فى أرض الواقع - بصراحة ما ليش غير صاحب واحد وزمايلى المعرفة يتعدوا على الصوابع - ما ليش برده علاقة حميمة بأى حد فى الفضاء الإفتراضى - حلوة الفضاء الإفتراضى دى-

جايز أنا اللى معقّد - أبويا دايما يقولّى كده -، أو أنا عبقرى و العالم كلها مبتفهمش، أو العالم عباقرة و أنا ولا مؤاخذة حمار، على العموم ما تفرقش لأن أنا أساسا مش متأكد لسه هل دى حجة كويسة ولا مش كويسة.